Eyni dəqiqə, eyni hesab

“İnter”lə oyunda fərqlənən Aleksey Qay “Qəbələ”nin bu il ən erkən qolunun muəllifi olub. Allsport.az xəbər verir ki, 33 yaşlı ukraynalı yarımmudafiəci 5-ci dəqiqədə rəqib qapısına yol tapıb.

Bölgə təmsilçisi Roman Qriqorcukun dovrundə bunadək ən tez qolu da Qəbələdə paytaxt təmsilcisi ilə matcda vurmuşdu. Seneqallı hucumcu Viktor Mendi 22-ci turda fevralın 15-də “Neftci”ylə ev oyununun 10-cu dəqiqəsində hesabı acmışdı. Ancaq sonradan 3 qol vuran rəqib komanda 3:1 hesabı ilə qalib gəlmişdi.

Rekorda şərik olan…

Bu dəfə Mendidən 5 dəqiqə tez fərqlənən Qay cari çempionatda rekorda şərik olub. Belə ki, “Qəbələ” cari çempionatda ən erkən qolunu məhz 5-ci dəqiqədə vurub. Maraqlıdır ki, bu, qəbələlilərin axırıncı turda görüşəcəyi “Bakı”yla ilk ev oyununda olub. Həmin matçın 5-ci dəqiqəsində braziliyalı yarımmüdafiəçi Dodo bakılıları oyuna mərkəzdən başlamağa məcbur etmişdi. Ümumiyyətlə, həmin görüş və “İnter”lə son matç, demək olar, eyni ssenari ilə gedib. Təsadüfi deyil ki, 11-ci tur çərçivəsində noyabrın 2-də keçirilən həmin oyunda da rəqib fasiləyədək tarazlığı bərpa edə bilmiş və 1:1 hesabı sonadək dəyişməmişdi.

…və ilk hissədə fərqlənən Qay

Qış fasiləsində “Qəbələ”yə keçən Aleksey artıq 4-cü qolunu vurub. İlk vaxtlar fərqlənə bilməyən təcrübəli futbolçu Azərbaycanda qol hesabını 26-cı turda martın 18-də “İnter”ə 2:1 hesabı ilə qalib gəldikləri oyunun 40-ci dəqiqəsində açıb. Bundan sonra o, “Neftçi” (3:1, 25-ci dəqiqə) və “Sumqayıt”la (2:0, 39-cü dəqiqə) səfər matçlarında fərqlənmişdi.
Maraqlıdır ki,”Şaxtyor”un heyətində UEFA qalibi olan legioneri Topaz Premyer Liqasında, bir qayda olaraq, ilk hissədə fərqlənir və komandası həmin matçlarda mütləq xal qazanır. Qay “qırmızı-qaralar”ın cari çempionatda bombardilər siyahısında 4 qolla 4-cü pillədə qərarlaşıb. Ən sərrast futbolçu isə 11 qolun müəllifi Cavid Hüseynovdur. Siyahıda sonra gələn Mendi 7, Dodo 5 dəfə fərqlənib. Kapitan Ruslan Abışov və nigeriyalı Ekiqo Ehiosun 4 qola imza atıblar. Bəxtiyar Soltanov 2, Ürfan Abbasov, slovakiyalı Pavol Farkaş və braziliyalı sabiq legioner Markinyoş hərəyə 1 dəfə fərqləniblər. Daha 3 qol isə Laşa Kasradze (AZAL), Vüqar Bəybalayev (“Bakı”) və Namiq Ələsgərovun (“Qarabağ”) avtoqollarıyla gerçəkləşib.

Qay kimi cari mövsümdə eyni komandaya, azı, 2 oyunda qol vuran futbolçular var. Bu baxımdan rekordçu Caviddir. 27 yaşlı yarımmüdafiəçi AZAL-a 4, ”Xəzər Lənkəran”la “Sumqayıt”ın hər birinə 2 qol vurub. Mendi isə “Neftçi”nin qapısına 2 dəfə yol tapıb.

“Qəbələ” üçün populyar hesab

Cari mövsümdə ən çox qeydə alınan hesab 1:1-dir. Belə ki, ölkə kubokunu da nəzərə alsaq, “qırmızı-qaralar”ın hesabında olan 34 matçın 6-sı bu hesabla nəticələnib. Həm də 1:1 hesabı ən çox – 2 dəfə məhz “İnter”lə oyunlarda, özü də Qəbələdə qeydə alınıb. Sırf heç-heçələrə gəlincə, 3 dəfə 0:0, 1 dəfə isə 3:3 hesabı qeydə alınıb. Komanda bu mövsüm daha çox 2:0 hesabı ilə qalib gəlib – 4 dəfə. Qalan qələbələr 3:1, 2:1, 1:0 (hərəsində 3 dəfə), 4:0 və 3:0 (hərəsində 1 dəfə) hesabları ilə olub. Məğlubiyyətlər isə 0:3, 0:2 (hərəsində 2 dəfə), 0:1, 0:4, 1:3, 2:3, 1:2 (hərəsində 1 dəfə) hesablarıyla baş verib.