Gəncə idman sarayında görüş

“AzerGold” QSC-nin idarə heyətinin sədri Zakir İbrahimov Gəncə idman sarayında səhmdar cəmiyyətinin baş sponsoru olduğu “Gəncə” voleybol klubunun komanda üzvləri ilə görüşüb.

Allsport.az xəbər verir ki, görüşdə klubun prezidenti Elvar Osmanov təlim-məşq prosesindən bəhs edib, komanda üzvlərinin fiziki və psixoloji hazırlığının yüksək səviyyədə olduğunu diqqətə çatdırıb.

Z.İbrahimov daha sonra “Gəncə” klubunun məşq prosesini izləyib, o cümlədən voleybol akademiyasının yeniyetmə idmançıları və məşqçilərilə görüşüb.

Klubun gələcək planları, ehtiyacları, heyətin gücləndirilməsi istiqamətində atılacaq addımlar barədə geniş fikir mübadiləsi aparılıb.

2024-cü ilin kollektiv üçün uğurlu olduğunu bildirən Z.İbrahimov heyəti qarşıdan gələn 31 Dekabr – Dünya Azərbaycanlılarının Həmrəyliyi Günü və Yeni il münasibətilə təbrik edib, klubun yeni ildə də yüksək nailiyyətlər əldə edəcəyinə inandığını bildirib və onlara uğurlar arzulayıb.