Azərbaycan keyfiyyətini itirmiş medallara görə BOK-a müraciət edib. Fransanın başı dərddə

Parisdə keçirilən XXXIII yay olimpiya oyunlarında Azərbaycan komandasının 7 idmançısı cüdo, taekvondo, boks, yunan-Roma və sərbəst güləş idman növü üzrə medal qazanıb.

Allsport.az xəbər verir ki, medallardan 2-si qızıl, 2-si gümüş, 3-ü isə bürünc olub. Parisdə uğurla çıxış edərək mükafat qazanan olimpiyaçılarımız bu ay milli olimpiya komitəsinə medalların keyfiyyətini itirməsi ilə bağlı müraciət ediblər.

Milli olimpiya komitəsi həmin idmançıların müraciəti əsasında araşdırmalar aparıb və nəticədə məlum olub ki, cüdo üzrə olimpiya çempionu Hidayət Heydərov (73 kq) və sərbəst güləş üzrə bürünc mükafatçı Məhəmmədxan Məhəmmədovdan (97 kq) başqa, digər beş idmançının medallarında nəzərəçarpan dərəcədə dəyişiklik baş verib.

Məlum olub ki, cüdo üzrə olimpiya çempionu Səlim Kotsoyevin (100 kq) qızıl, taekvondoçu Həşim Məhəmmədovun (58 kq), boksçu Alfonso Dominqesin (92 kq) gümüş, yunan-Roma güləşçisi Həsrət Cəfərov (67 kq) və sərbəst güləşçi Giorgi Meşvildişvilinin (125 kq) bürünc medalları keyfiyyətini itirib.

Milli olimpiya komitəsi bu araşdırmaların nəticəsi olaraq beynəlxalq olimpiya komitəsinə (BOK) rəsmi müraciət ünvanlayıb. BOK-dan bu müraciətlə bağlı cavab gəldikdən sonra medalların geri qaytarılması və yeniləri ilə əvəz olunmasıyla bağlı növbəti addımlar atılacaq.