“Kişinyov-Zirvə”nin ağırlıqqaldıranı mütləq çempion olub

Tailandın Çyanq May şəhərində ağırlıqqaldırma üzrə 4-cü universitetlərarası dünya çempionatı keçirilib. Allsport.az saytı zirve-ik.com-a istinadən xəbər verir ki, bu yarışda “Zirve İnternational Sport Clubs”ın bir nümayəndəsi də iştirak edib. “Kişinyov-Zirvə” klubunun ağır atleti Dumitru Kaptari 77 kq çəki dərəcəsində qüvvəsini sınayıb.

2 il əvvəl eyni turnirin bürünc mükafatçısı olan idmançı, bu dəfə fəxri kürsünün ən yüksək pilləsinə qalxıb. Kaptari birdən qaldırmada 155 kq, təkanla qaldırmada isə 195 kq-ın öhdəsindən gəlib. Toplamda 350 kq (155+195) nəticə göstərən Dumitru Çempionatın qızıl medalına layiq görülüb. O, ən yaxın rəqibindən 34 kq artıq çəkini ram edib.

Bununla yanaşı, Kaptari bütün kişi idmançılar arasında mütləq qalib adını qazanıb. Sinkleyr cədvəli üzrə 440.7887 xal toplayan moldovalı atlet, hamını arxada qoymağı bacarıb.