“Motorola Solutions” da rəsmi dəstəkçi oldu

Bakı-2015 rəsmi radio kommunikasiyaları dəstəkçisi olan “Motorola Solutions”la əməkdaşlığa başlayır. Allsport.az saytı xəbər verir ki, şirkət mühüm kommunikasiya həlləri, ictimai təhlükəsizlik və kommersiya istehlakçılarına xidmət sahəsində aparıcı provayderdir. Amerikalılar tədbirin maneəsiz, effektiv kommunikasiya və koordinasiya edilməsi məqsədi ilə 1-ci Avropa Oyunları üçün rəqəmsal radio xidmətləri göstərəcək.

Bakı-2015-in əməliyyatlar üzrə baş direktoru Saymon Kleq əməkdaşləq barədə belə deyib: “Bu müqavilə Motorola Solutions şirkətinin Bakı-2015-ə dəstək göstərmək üçün geniş təcrübəsindən istifadə edəcəyini göstərir. Bu çox vacibdir ki, biz oyunlar zamanı öz aramızda müntəzəm yüksək keyfiyyətli kommunikasiya qurmaq imkanına malik olacağıq. Biz birlikdə çalışacağıq və tarixdə ilk Avropa Oyunlarının uğurla həyata keçirilməsində Motorola Solutions mühüm rol oynayacaq”.

Motorola Solutions şirkətinin Şərqi Avropa, Rusiya və Mərkəzi Asiya üzrə vitse-prezidenti Aksel Rettiq anlaşma barədə bunu söyləyib: “Motorola Solutions şirkəti uzun illərdir ki, iri beynəlxalq idman yarışları üçün uğurlu və etibarlı kommunikasiya xidmətləri göstərmişdir. Bakı 2015-in Rəsmi Dəstəkçisi olmağımız bizim üçün şərəfdir və biz qarşıdan gələn aylarda onlarla birgə işləməyi səbirsizliklə gözləyirik”.

Sazişin bağlanması ilə “Motorola Solutions” McDonald’s Azərbaycan, “Tickethour”, “Milla” və “Sitecore” şirkətlərindən sonra, Bakı 2015-in 5-ci rəsmi Dəstəkçisinə çevrilib.