Nailxan Nəbiyev: Məşqlərdə əlimizdən gələni etmişik

Dekabrın 20-də Dohada Qətər kuboku start götürəcək. Yarışa 3 ağırlıqqaldıranımız yollanacaq. Yığma üzvlərindən biri 96 kq-da təcrübəli Nailxan Nəbiyevdir. Allsport.az saytına açıqlamasında o, lisenziya xalı verən sınaqda imkanları belə dəyərləndirib:

“Yarışa normal hazırlaşmışıq. Məşqlərdə əlimizdən gələni etmişik. Qaydaların dəyişərək çətinləşməsinə rəğmən, istərəm ki, ənənə davam etsin, bu olimpiadada təmsil olunaq. Düzdür, 2-3 ay öncə əməliyayt olundum. Hələ tam bərpa olunmamışam. Medal fürsəti əlli əlliyədir”.