Naxçıvanda seleksiya məşqləri

Naxçıvan futbol federasiyasının təşkilatçılığı ilə 15 və 16 yaşadək futbolçular üçün seleksiya günü təşkil olunub.  Allsport.az saytı xəbər verir ki, məşqlərdə müxtəlif rayon və şəhərlərindən ümumilikdə 60-a yaxın yeniyetmə iştirk edib.

Onlar əvvəlcə məşqçilər tərəfindən verilən tapşırıqları icra edib, daha sonra ikitərəfli oyunlarda nəyə qadir olduqlarını göstərməyə çalışıblar. Muxtar respublikada, eləcə də “Araz-Naxçıvan” PFK-nın akademiyasında çalışan futbol məşqçiləri qabiliyyətli və istedadlı futbolçuları müəyyən ediblər.

Seçilən yeniyetmələrdən ibarət komanda formalaşdırılacaq və onlar mütəmadi olaraq məşqlərə və oyunlara cəlb olunacaqlar. İnkişaf edən və fərqlənən futbolçular gələcəkdə “Araz-Naxçıvan” PFK-nın akademiyasına qəbul olunacaqlar.

Bu seleksiya xarakterli məşqlər hər həftə təşkil olunacaq. Növbəti məşqdə qapıçılarla bağlı seçim ediləcək.