Norza Zakaria: “Bu bizim əhəmiyyətli münasibətlərimizin başlanğıcıdır”

Bu gün Azərbaycan badminton federasiyası və bu idman növündə dünyada öncüllərdən olan Malayziyanın badminton federasiyası (MBF) arasında əməkdaşlıq memorandumu imzalanıb.

Allsport.az xəbər verir ki, MBF-nin prezidenti Mohamad Norza Zakaria anlaşma ilə bağlı bunları deyib:
“Düşünürəm ki, Malayziya badminton federasiyası ilə Azərbaycan badminton federasiyası arasında bağlanan anlaşma memorandumu tarixi və vacib əməkdaşlıqdır.

Bu bizim münasibətlərimizin genişlənməsi deməkdir. Bildiyiniz kimi Azərbaycanın 3 yeniyetmə badmintonçusu Malayziyada bizim badminton akademiyamızda məşq edərək təhsil alır.

Ülvi , Əmirxan və Əminə bizim 16 yaşadək komandamızla birlikdə təlim-məşq toplanışı keçir. Bu bizim əhəmiyyətli münasibətlərimizin başlanğıcıdır. Azərbaycanın həm məşqçilər , həm də idmançıları ilə təcrübəmizi bölüşməklə mental olaraq onların badmintonda səviyyəsinin yüksəlməsinə töhfə verməyə çalışacağıq”.