Ölkə başçısı olimpiya və paralimpiya çempionlarına dövlət dəstəyini artırdı

Ölkə başçısı İlham Əliyev olimpiya və paralimpiya çempionlarına dövlət dəstəyinin artırılması haqqında fərman imzalayıb. Allsport.az saytı xəbər verir ki, orada paralimpiya çempionları üçün Azərbaycan prezidentinin xüsusi paralimpiya təqaüdünün təsis olunması və onun aylıq məbləğinin minimum aylıq əməkhaqqı məbləğinin 2 (iki) misli miqdarında müəyyən edilməsi qeyd olunub.

Təsis edilən təqaüdün gənclər və idman nazirliyi tərəfindən dövlət büdcəsinin vəsaiti hesabına ödənilməsi müəyyən edilib. Fərmana əsasən, olimpiya çempionları üçün Azərbaycan prezidentinin xüsusi olimpiya təqaüdünün məbləği isə minimum aylıq əməkhaqqı məbləğinin 4 (dörd) misli miqdarında müəyyən edilib.

Həmçinin “Azərbaycanın olimpiya çempionları üçün Azərbaycan respublikası prezidentinin xüsusi olimpiya təqaüdlərinin təsis edilməsi haqqında” Azərbaycan prezidentinin 2002-ci il 10 oktyabr tarixli 798 nömrəli Fərmanının (Azərbaycan respublikasının qanunvericilik toplusu, 2002, № 10, maddə 594 (Cild I) 1-ci hissəsində “1300 (min üç yüz) manat məbləğində” sözü “minimum aylıq əməkhaqqı məbləğinin 4 (dörd) misli miqdarında” sözləri ilə əvəz edilməsi qeyd olunub.

Nazirlər kabinetinə bu fərmandan irəli gələn məsələləri həll etmək tapşırılıb.