“Qarabağ” Avstriyadadır

“Qarabağ” 2015/16 mövsümünün hazırlığına start verib. Allsport.az xəbər verir ki, son ölkə çemponu və kubokun sahibi olan komanda ötən il olduğu kimi, bu dəfə də təlim-məşq toplanışı üçün Avstriyaya yollanıb.

Avstriya – Almanya sərhəddində, Tirol şəhərinə yaxın Kössen qəsəbəsində məskunlaşan komanda ötən ilki oteldə məskunlaşıb. 21 günlük təlim-məşq toplanışı keçirməyi planlaşdıran ağdamlılar dünən Bakı – İstabul – Münhen reysiylə günorta saaatlarında ölkəni tərk edib. Bavariya əyalətinin ən böyük şəhərindən isə heyət avtobusla Kössenə yollanıb. Təxminən saat yarımlıq yolçuluqdan sonra Alp dağlarının yamacında yerləşən otelə çatanda Bakı saaatıyla 03:00 idi.

“Qarabağ” Bakıdan təlim-məşq toplanışına tam heyətlə yollanmayıb. Əsas və U-21 millisində olan futbolçular ötən mövsümü gec qapadığından komandaya iyunun 23-də qoşulacaqlar. Ötən mövsümün gedişində komandanın sıralarına qatılsa da, reqlament səbəbindən meydana çıxmaq şansı olmayan Dani Kintana da Münhendə düşərgəyə qoşulub. Digər legionerlər isə bu gün və sabah komandanın düşərgəsinə qoşulacaqlar. Sadəcə, sentyabrdan zədəli olan braziliyalı legioner Çumbinyonun iyunun 30-da təlim-məşq toplanışına qoşulacağı gözlənilir.

“Qarabağ” Avstriyada təlim-məşq toplanışı müddətində 3 və ya 4 yoxlama oyunu keçirəcək. Oyunlar iyunun 30-da, iyulun 4, 7 və 8-də olacaq.

Bu günə komandanın tək məşqi var. Futbolçular yerli vaxtla 18:00-da (Azərbaycan vaxtıyla 21:00) günün yeganə çalışmasına çıxacaq.