“Qarabağ”ın rəqibini yaxından bilək

“Qarabağ” Çempionlar Liqasının 3-cü ələməsində Çex Respublikasının “Viktoriya” klubu ilə qarşılaşacaq. Allsport.az saytı “atlılar”ın rəqibi haqda ətraflı məlumatı təqdim edir: “qırmızı-göylər” 1911-ci ildə Plzen şəhərində yaradılıb. Bir neçə dəfə adını dəyişdirən klub, son olaraq 1993-cü ildən hazırki adını daşıyır. Komanda ev oyunlarını 11 min 722 tamaşaçı tutumu olan “Dusan Arena”da keçirir.

Plzen təmsilçisi 4 dəfə ölkə çempionu olmağı bacarıb (2010-11, 2012-13, 2014-15 və 2015-16). İki dəfə Çexiya kubokunu qazanan (1970/71, 2009/10) “Viktoriya”, iki dəfə də Super Kuboku (2010-11 ve 2015-16) başı üzərinə qaldırıb.

Çex klubu tarixi ərzində təsnifat mərhələsi də daxil olmaqla Çempionlar Liqasında 26 matçda 15 qələbə, 2 heç-heçə, 9 məğlubiyyət görüb. Avropa Liqasında isə meydana çıxdığı 34 qarşılaşmada 16 dəfə qələbə sevinci yaşayan çexlər, 7 matçdan sülhlə ayrılıb, 11 dəfə də meydanı məğlub tərk ediblər.

“Viktoriya” 2011/12-ci il mövsümündə tarixində ilk də ÇL-nın qrup mərhələsinə vəsiqə qazanmağı bacarıb. “Barselona” və “Milan”dan sonra qrupda 3-cü yeri tutan komanda mübarizəni Avropa Liqasında davam etdirib. Burada “Şalke”yə məğlub olan “göy-qırmızılar” çıxışını dayandırıb. 2012/13-cü il mövsümündə Avropa Liqasının qrupunda mübarizə aparan Plzen təmsilçisi “Atletiko” (İspaniya), “Akademika” (Portuqaliya) və “Hapoel”lə (İsrail) mübarizə aparıb. “Viktoriya” 1/16 finala vəsiqə qazana bilib və bu mərhələdə İtaliya “Napoli”sini mübarizədən kənarlaşdırıb. (3:0, 2:0) Çexiya təmsilçisi 1/8 finalda isə “Fənərbağça” (Türkiyə) səddinə ilişib. (1:1, 0:1)

2013/2014 mövsümündə Çempionlar Liqasının qrupunda iştirak etmək hüququ əldə edən “Viktoriya” “Mançester Siti”, ÇSKA  və “Bavariya” kimi klublarla qarşılaşmalı olub. Qrupda 3 xal toplayan və mübarizəni Avroliqada davam etdirmək imkanı qazananan “Viktoriya” əvvəlcə Ukrayna “Şaxtyor”unu mübarizədən kənarlaşdırsa da, daha sonra “Lion” səddində ilişib.

2014/2015 mövsümündə Avroliqada iştirak edən “Viktoriya” mübarizəyə üçüncü təsnifat mərhələsindən qoşulub. Bu mərhələdə plzenlilər Rumıniya “Petrolul”una “ilişib”. (1:1, 1:4).

Ötən mövsümü isə “Viktoriya” Çempionlar Liqasının üçüncü təsnifat mərhələsində Təl-Əviv “Makkabi”si ilə bacarmayıb (2:1, 0:2). Plzen təmsilçisi Avroliqanın pley-off mərhələsində isə Serbiyanın “Voyvodina” klubunu mübarizədən kənarlaşdırıb (3:0, 2:0). AL-in qrup mərhələsinə vəsiqə qazanan Çex təmsilçisi “Dinamo” (Belarus), “Vilyarreal” (İspaniya) və “Rapid” (Avstriya) klubları ilə mübarizə aparıb, lakin növbəti mərhələyə vəsiqə qazana bilməyib.

Komandaya 2011-ci ildən yerli mütəxəssis olan Roman Pivarnik rəhbərlik edir. Maraqlıdı ki, “Viktoriya”nın heyətində cəmi 2 ölkədən olan futbolçular çıxış edir. Komandanın əsasını çexiyalılar təşkil edir. Onlarla yanaşı, “Viktoriya”da 5 slovakiyalı legioner var. (Matuş Kozaçik, Patrik Hroşovski, Yakub Hromada, Mixal Duriş və Marek Bakoş). Xatırladaq ki, “Qarabağ”ın “Viktoriya” ilə ilk oyunu 26 iyulda səfərdə, cavab matçı isə 1 həftə sonra Respublika stadionunda baş tutacaq.