Rəhim Həsənov 3 qol, 4 sarı, 1 qırmızı vərəqə qeydə aldı

Azərbaycanlı hakimlər briqadası UEFA Gənclər Liqasının birinci təsnifat mərhələsi çərçivəsində baş tutmuş “Saburtalo” (Gürcüstan) – “Midtyulland” (Danimarka) matçını idarə ediblər. Allsport.az xəbər verir ki, Rəhim Həsənovun baş hakim olduğu qarşılaşma Tiflis şəhərində baş tutub və qonaq komandanın 2:1 hesablı qələbəsi ilə başa çatıb. Nəticədə, iki oyunun nəticəsinə görə 5:2 hesabıyla üstün olan qonaqlar mərhələ adlayıblar.

Qeyd edək ki, Həsənov bu oyunda 4 sarı, 1 qırmızı vərəqə göstərib. “Sarı”lardan ikisi meydan sahiblərinə, ikisi qonaqlara qismət olub. Amma qonaqların heyətində hər iki sarı vərəqəni eyni futbolçu aldığından, o, 88-ci dəqiqədə meydandan qovulub.

Qeyd edək ki, Həsənova bu qarşılaşmada yan xətt hakimlərimiz Namiq Hüseynovla Akif Əmirəli kömək edib.