Rahid Əmirquliyev: Avrokuboklarda komandama tam gücümlə kömək etməyə çalışacağam

“Qarabağ”ın yarımmüdafuəçisi Rahid Əmirquliyev artıq uzunmüddətli zədəsini tam sağaldaraq, komandasının Avstriyada davam edən təlim-məşq toplanışına qatılıb. Allsport.az saytı xəbər verir ki, o, klubun rəsmi saytına açıqlamasında zədəsinin son durumu, komandanın yarımmüdafiə xəttindəki rəqabətdən və Çempionlar Liqasındakı ilk rəqibdən danışıb:

“6 aya yaxın yaşıl meydanlardan uzaq qaldım, amma indi durumum yaxşıdır. Komandayla məşqlərimi davam etdirirəm. Düzdür, yüz faiz hazır deyiləm, amma avrokuboklarda ilk oyuna qədər komandama tam gücümlə kömək etmək üçün çalışacağam.

Komandaya yanvarda qoşuldum və cəmi 2-3 oyunda oynadım. Az oynamağıma baxmayaraq, daim komandayla birlikdə olmuşam. Özümü yeni transfer kimi hiss etmirəm.

“Qarabağ”ın yarımmüdafiə xəttində necə bir rəqabətin olduğu hamıya məlumdur. Belə rəqabətin olması həm mənim, həm də bu mövqedə mübarizə aparan digər futbolçular üçün yaxşıdır. Bir yer uğrunda mübarizə gedirsə, futbolçu  öz üzərində daha çox işləyir. Belə rəqabətdən heç bir problem olmaz, əksinə qazanan futbolçular olacaq. Meydana çıxıb-çıxmamağıma isə baş məşqçimiz qərar verəcək.

Çempionlar Liqasında Lüksemburqun son mövsüm “qızıl dubl” edən “Düdelanj”ıyla qarşılaşacağıq. Rəqib haqda elə də ətraflı məlumatım yoxdur. Onların heyətində çox saylı legionerlər oynadığını bilirəm. Yəqin ki, bir neçə gün sonra rəqibi təhlil edəcəyik. Avrokuboklarda ilk oyunlar həmişə çətin olur. Qarşılaşmaya ciddi hazırlaşırıq, bilirik ki, bizim üçün heç nə asan olmayacaq. Əlimizdən gələni edəcəyik ki, növbəti mərhələyə vəsiqə qazanaq”.