Ramin Musayev klublara səsləndi: “Özgəsində günah axtarmayın”

“Bütün klublara yeni mövsümdə uğurlar arzulayıram”. Allsport.az saytı xəbər verir ki, bunu PFL prezidenti Ramin Musayev deyib. O, yeni mövsümün püşkatmasında çıxışı zamanı, öncə avrokuboklarda çıxışını dəyərləndirib: “Qarabağ” istisna olmaqla dünənki nəticələr bizim üçün üzücü oldu. “Qarabağ” və “Neftçi”yə avrokuboklarda uğurlar arzulayıram”.

O, klublara irad da tutub: “Bəzi yoldaşlar öz səhvlərini çempionatda görürlər. Bizim çempionat zəif idisə, “Qarabağ” burdan çempionlar liqasına niyə vəsiqə qazandı, reytinqimiz niyə qalxmadı, çempionluq niyə son dəqiqədə müəyyənləşdi. Çempionat maraqlıdır ki, bunlar yaşandı. İnsan səhvi özündə axtarmasın.

Həm klub məşqçilərinə və rəhbərlərinə səslənirəm: özgəsində günah axtarmayın. Klubda çalışmağın nə demək olduğunu bilirəm. Avrokuboklarda normal iştirak etmək istəyən klub qış fasiləsində heyətini gücləndirilməlidir. Əksər klublarımız gözləyirlər ki, vəsiqə qazanaq, sonra heyəti gücləndirərik.

Bəzi komandalar avrokubok öncəsi heç yeni baş məşqçisini bilmir, qalmışdı ki, yeni futbolçusunu bilə. Hər bir klubumuza uğurlar arzulayıram. İnşallah, pandemiya bizdən uzaq olar, çempionatımız normal keçər”.