“Türkiyə ilə Azərbaycan futbolu arasında fərq var”

“Kəpəz”in yeni transferi Mahamadu Ba açıqlama verib. Allsport.az saytı xəbər verir ki, malili futbolçu Gəncə klubuna keçidi ilə bağlı fikrini bölüşüb: “Karyeramda yeni bölüm başlayır. Türkiyədən sonra ölkənizdə legioner həyatı yaşayacağam.

Bura gəldiyimə görə şadam. Klubda məni olduqca mehriban qarşıladılar. Bir neçə gündür ki, düşərgədəyəm. Həvəslə məşq edirəm. Yaxşı bazamız var. “Kəpəz”in Bakıda “Zirə” ilə oyununu stadiondan canlı izləmək imkanım oldu. Komandanın çıxışı bilirəm ki, azarkeşlərin ürəyincə deyil. Amma kollektiv olaraq vəziyyəti dəyişmək üçün çalışırıq.

Türkiyə ilə Azərbaycan futbolu arasında fərq var. Azərbaycanda komandalar fiziki oyuna üstünlük verməyə səy göstərirlər. İlk baxışdan hər halda belə görünür. Türkiyədə isə başqa cürdür. Super liqada komandalar taktiki-texniki cəhətdən seçilməyə çalışırlar”.