Voleybol federasiyasının rəsmisinə təyinat

Azərbaycan voleybol federasiyasının “Təlim və aşağı yaş qrupları üzrə iş” şöbəsinin koordinatoru Nərgiz İsmayılova Avropa voleybol konfederasiyası tərəfindən təyinat alıb.

Allsport.az xəbər verir ki, İsmayılova yanvarın 8-də qadın voleybolçular arasında çempionlar liqasının “B” qrupu çərçivəsində baş tutacaq “SSC Palmberg Şiverin” (Almaniya) və “Levalye Paris Seint Klud” (Fransa) komandalarının oyununda hakimlərin işinə qiymət verəcək.

Almaniyanın Şiverin şəhərində təşkil olunacaq qarşılaşmanın hakimləri ispaniyalı Rodriqes Maçin Mariya de las Olas və polşalı Mihlik Agnyeszkadır.

N.İsmayılova Avropa voleybol konfederasiyası bayrağı altında keçirilən oyunlarla yanaşı, bu ildən etibarən beynəlxalq voleybol federasiyası tərəfindən keçiriləcək yarışlara da supervayzer kimi təyinat alacaq.