Bu gün Namiq Abdullayevin doğum günüdür

Bu gün Olimpiya çempionu (Sidney-2000) və gümüş medalçısı (Atlanta-1996), Dünya Kubokunun sahibi (2004), Dünya çempionatının üç dəfə gümüş (1994, 1998, 2002) və bürünc medalçısı (2006), Hərbçilərin dünya çempionatının gümüş medalçısı (1995), üçqat Avropa çempionu (1994, 1995, 2003), iki dəfə gümüş (1997, 2006) və bürünc medalçısı (1996), Ümummilli Lider Heydər Əliyevin xatirəsinə həsr olunmuş “Qızıl Qran Pri” beynəlxalq turnirinin gümüş medalçısı (2008); MDB çempionu (1992), SSRİ Kubokunun sahibi, Aleksandr Medvedin xatirə turnirinin üçqat qalibi, İvan Yarıginin xatirəsinə beynəlxalq turnirin qalibi (1996), SSRİ gənclər yığmasının tərkibində Dünya Kubokunun sahibi (1990), gənclər arasında SSRİ çempionu (1991), Azərbaycan Güləş Federasiyasının vitse-prezidenti Namiq Abdullayevin doğum günüdür. Allsport.az xəbər verir ki, pəhləvan çempionumuzun 45 yaşı tamam olur.

Bu münasibətlə onu təbrik edir, uzun ömür, can sağlığı arzulayırıq. Ölkəmizdə güləşin inkişafındakı xidmətlərinə və nailiyyətlərinə görə, Namiq Abdullayev Azərbaycan Respublikası Prezidentinin Sərancamları ilə 1995-ci ildə “Tərəqqi” medalı, 2000-ci ildə isə “Şöhrət” ordeni ilə təltif olunub, 2012-ci ildə Əməkdar Bədən Tərbiyəsi və İdman Xadimi fəxri adına layiq görülüb.