“Bu turnirdən komandamız lazım olan təcrübəni qazandı”

Voleybol üzrə 18 yaşadək qızlardan ibarət milli komandamızın EEVZA çempionatındakı çıxışı barədə baş məşqçi Şahin Çatma açıqlama verib.

Allsport.az xəbər verir ki, o, bunu deyib:

“Qrupumuzda Polşa və Gürcüstan komandaları ilə qarşılaşdıq. İlk oyunda keçən il Avropa çempionu olmuş Polşaya 0:3 hesabı ilə uduzduq. Sonra ev sahibi Gürcüstanla qarşılaşdıq. Belə turnirlərdə ev sahibi komandaya qarşı oynamaq çətindir, amma qızlarımız bu oyunda çox yaxşı çıxış edərək 3:1 hesabı ilə qalib gəldilər və qrupu ikinci yerdə başa vurduq.

Daha sonra digər qrupun ikincisi Estoniya ilə qarşılaşdıq və 0:3 hesabı ilə məğlub olduq, turniri 4-cü yerdə tamamladıq. Hər turnir idmançılar üçün böyük təcrübə və inkişaf imkanıdır. Deyə bilərəm ki, bu turnirdən də komandamız lazım olan təcrübəni qazandı”.