“Ani diqqətsizlikdən qapımızda qol gördük”

Avropa liqasında əsas mərhələinin altıncı turu çərçivəsində keçirilən “Elfsborq” (İsveç) – “Qarabağ” matçından (1:0) sonra təmsilçimizin baş məşqçisi Qurban Qurbanov mətbuat konfransında görüş barədə fikrini bildirib. Allsport.az xəbər verir ki, o, oyunçuların sona qədər mübarizə apardığını deyib:

“Yaxşı müdafiə olunan komandaya qarşı oynayırdıq. Təəssüf ki, məğlub olduq. Halbuki bura qələbə qazanmaq üçün gəlmişdik. Futbolçularım sona kimi mübarizə apardılar. Sadəcə, futbol səhvlər üzərində qurulub. Ani diqqətsizlikdən qapımızda qol gördük. İstənilən halda, futbolçularıma təşəkkürümü bildirirəm. Bu il çox zəhmət çəkdilər. Daha da böyümək üçün irəli baxmalıyıq. Builki avrokubok oyunları yaxşı təcrübə oldu”.

Baş məşqçi qış transfer dönəmində heyətə yeni oyunçu cəlb etməyə çalışacaqlarını deyib: “Hər il komandaya yeni oyunçular cəlb etməyə çalışırıq. Ancaq bu o demək deyil ki, əlimizdəki futbolçuları göndərməyi düşünürük. Yeni oyunçu axtarışındayıq. Transfer dönəmində bir neçə yenilik etmək istəyirik. Bu da gedişatdan asılıdır”.