Həmyerlimiz Ukrayna paytaxtında “Bakinets” idman klubu açıb

Ukrayna paytaxtının böyük “Dream Town-1” ticarət-əyləncə mərkəzində sərbəst güləş üzrə “Bakinets” idman klubu açılıb. Allsport.az saytı xəbər verir ki, bu qurum Kiyevdə yaşayan həmvətənimiz, gənclər arasında Avropa çempionu və Azərbaycanın əməkdar idman ustası Oleq Krapivinin təşəbbüsü və sponsorluğu ilə fəaliyyətə başlayıb.

“Bakinets” güləş zalı, trenajorları, zəruri avadanlığı, soyunub-geyinmə və duş otaqları, habelə tibb məntəqəsi olan müasir idman klubudur.

Həmşəhərlimiz, həmçinin Ukrayna Azərbaycanlıları Konqresinin Kiyev şəhər təşkilatının sədri, “Azərbaycançılıq İnstitutu” beynəlxalq ictimai birliyinin prezidentidir. Bu yaxınlarda o, Bakıda keçirilən Dünya Azərbaycanlılarının 4-cü qurultayında iştirak edib.

Forum haqqında təəssüratlarını bölüşən Oleq Krapivin bildirib ki, harada yaşamasından asılı olmayaraq hər bir azərbaycanlı həyat və fəaliyyətinin bütün sahələrində ölkəsini, tarixi vətənini fəal təbliğ etməlidir. “Bakinets”in fəaliyyətə başlaması ilə dost Ukraynada Azərbaycan idmanının təbliğinə öz töhfəmi vermək istəyir.