Heydər Əliyev adına idman-konsert kompleksində fəaliyyət göstərən idman növlərinə baxış

Gənclər və idman naziri Fərid Qayıbov, Heydər Əliyev adına idman-konsert kompleksində fəaliyyət göstərən bir sıra idman bölmələrinə baxış keçirib. Allsport.az saytı xəbər verir ki, o, qurğunun buz meydançasında qızlardan ibarət fiqurlu konkisürmə, oğlanlardan ibarət hokkey bölmələrinin məşqini izləyib; mütəxəssislər, məşqçilər və gənc idmançılarla söhbət ediblər.

Həmçinin ölkəmizdə ilk dəfə yaradılan körlinq idman növü ilə də maraqlanıb. Bildirilib ki, “Ocaq Sport” klubunun nəzdində açılan körlinq bölməsi idman ləvazimatları ilə təmin edilib və yaxın vaxtlarda bu idman növü ilə məşğul olmaq istəyənlər qruplara yazıla biləcəklər.

MMA, cüdo, gimnastika və stolüstü tennis bölmələrində də idmançıların məşq prosesi ilə maraqlanan nazir onlarla söhbət edib, məşqçiləri ilə fikir mübadiləsi aparıb, müvafiq tövsiyələr verib.

Hazırda idman-konsert kompleksində idmanın müxtəlif növləri ilə məşğul olmaq üçün əlverişli şərait yaradılıb. Burada peşəkar və həvəskar konkisürmə, hokkey, körlinqlə yanaşı, bədii gimnastika, kişi idman gimnastikası, qadın idman gimnastikası, batut gimnastikası və tamblinq, akrobatika gimnastikası, aerobika gimnastikası, gimnastika hamı üçün, parkur, timgim, hava gimnastikası, xüsusi olimpiya gimnastikası, cüdo, MMA, stolüstü tennis, şahmat və fitnes bölmələri də mövcuddur.

Azərbaycanda ən böyük trenajor zalı da məhz bu kompleksdə fəaliyyət göstərir. Hər yaş qrupundan olan insanlar burada həvəskar və peşəkar idmanla məşğul ola bilərlər.