İlham Əliyev avroliqanın finalı ilə bağlı sərəncam imzaladı

Azərbaycan prezidenti İlham Əliyev “UEFA Avropa Liqasının final oyununun 2019-cu ildə Bakı şəhərində təşkili və keçirilməsi ilə bağlı Azərbaycan Respublikasına gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında” sərəncam imzalayıb. Allsport.az saytı xəbər verir ki, sərəncamla avroliqasının paytaxtda final oyunu ilə əlaqədar Azərbaycana gələn və bu sərəncamın 2-ci hissəsində göstərilən sənədlərdən hər hansı birini təqdim edən əcnəbilər və vətəndaşlığı olmayan şəxslər 2019-cu il mayın 15-dən iyunun 1-dək beynəlxalq hava limanlarında viza ala biləcəklər.

Bundan başqa, nazirliyə Avropa liqasının final oyunu ilə əlaqədar Azərbaycan Respublikasına gələn şəxslər üçün viza prosedurlarının sadələşdirilməsi, habelə əcnəbilərin və vətəndaşlığı olmayan şəxslərin “ASAN Viza” sistemi vasitəsilə elektron viza almaq imkanı barədə məlumatın nazirliyin, eləcə də Azərbaycan Respublikasının xarici ölkələrdəki səfirliklərinin və konsulluqlarının internet informasiya ehtiyatlarında yerləşdirilməsini təmin etmək, dövlət miqrasiya xidməti Azərbaycana uçuşlar həyata keçirən aviasiya şirkətlərinə Avropa liqasının 2019-cu ildə Bakı şəhərində keçiriləcək final oyunu ilə əlaqədar ölkəyə gələn şəxslər üçün viza prosedurlarının sadələşdirilməsi barədə məlumat vermək tapşırığı da verilib.