Mikayıl Cabbarov qitə çempionatında uğurlu çıxış edən güləşçilərlə görüşüb

Xorvatiyanın paytaxtı Zaqrebdə keçirilən güləş üzrə Avropa çempionatında uğurlu nəticələri ilə bağlı tədbir keçirilib. Allsport.az saytı xəbər verir ki, toplantıda Azərbaycan güləş federasiyasının prezidenti Mikayıl Cabbarov, qazanılmış tarixi uğurlarla bağlı idmançılara ölkə başçısı İlham Əliyevin təbriklərini çatdırıb. Artıq bütün sərhədlərimiz boyunca Azərbaycan bayrağı dalğalanır və güləşçilərimiz Avropa çempionatında qazandıqları uğurları sərhədlərimizi qoruyan hərbi qulluqçularımıza, ali baş komandana və Azərbaycan xalqına həsr edir.

Bildirilib ki, sentyabrda Serbiyada təşkil ediləcək güləş üzrə dünya çempionatı 2024-cü ildə Parisdə keçiriləcək yay olimpiya oyunlarına lisenziyalar qazandıracaq və bu baxımdan həmin yarış böyük önəm kəsb edir. Dünya çempionatında uğurlu nəticələr əldə etmək üçün federasiya tərəfindən hər cür şərait yaradılacaq. Regionlarımızda da güləşin daha da inkişaf etdirilməsi mühüm əhəmiyyət kəsb edir. Bununla yanaşı, Los Anceles-2028-ə indidən hazırlaşmaq üçün, U-15 və U-17 yaş qruplarına xüsusi diqqət ayrılması da vacibdir.

AGF-in baş katibi Nəsimi Musayev, milli komandaların baş məşqçiləri Xetaq Qazyumov, Semyon Çterev, Aleksandr Tarakanov, aparıcı güləşçilərimiz Eldəniz Əzizli, Əliabbas Rzazadə, Jalə Əliyeva, AGF icraiyyə komitəsinin üzvləri Namiq Abdullayev və Fərid Mansurov çıxış edərək qazanılan uğurlar və hədəflərdən danışıb, güləşin inkişafı üçün təkliflərini səsləndiriblər.

Tədbirdə yeniyetmə və gənc nəslin sağlam ruhda yetişməsi və onlar arasında idmanın təşviqi, eləcə də bölgələrdə güləşin inkişafı istiqamətində görüləcək işlərlə bağlı fikir mübadiləsi aparılıb.

Xatırladaq ki, qitə çempionatında bahadırlar 5 qızıl, 6 gümüş və 3 bürünc olmaqla, ümumilikdə 14 medal qazanıblar. Sərbəst güləş üzrə millimiz komanda hesabında 1-ci, yunan-Roma güləşi üzrə millimiz isə 2-ci yeri tutub.