Millimiz Dağıstanda hazırlaşır

Sərbəst güləş üzrə Azərbaycan millisi Dağıstanda növbəti təlim-məşq toplanışını keçir. Allsport.az xəbər verir ki, yığmamız yanvarın 29-dan Mahaçqalada yerli komandayla birgə məşqlərini davam etdirir.

Baş məşqçi Namiq Abdullayev, böyük məşqçi Zəlimxan Hüseynov və məşqçi Arif Abdullayevin rəhbərliyi altında komandamız taktiki-texniki çalışmalara üstünlük verir. Başqa sözlə, xalça üzərində sparrinqlə məşqlər həyata keçirilir ki, bu da yarışlar ərəfəsində olduqca vacibdir.

Millimiz fiziki hazırlıqları üzrə məşqləri yanvarda Olimpiya Güləş Mərkəzində keçib. Mahaçqala toplanışı fevralın 15-dək davam edəcək.

Komandamız bu ay 2 yarışda qüvvəsini sınayacaq. Yığma üzvlərinin bir qismi fevralın 17-dən 20-dək Bolqarıstanın Veliko Tarnovo şəhərində Dan Kolov və Nikola Petrovun xatirəsinə keçiriləcək ənənəvi turnirdə çıxış edəcək. Digər güləşçilərimiz isə Türkiyəyə yollanacaq. Fevralın 24-dən 27-dək İstanbulda ilin ilk reytinq turniri baş tutacaq. Yaşar Doğu, Vehbi Əmrə və Hamit Kaplanın adını daşıyan yarışda pəhləvanlarımız da mübarizə aparacaq.