Mingəçevir reqatası ilk dəfə Füzulidə

16-18 oktyabr tarixlərində gənclər və idman nazirliyi (GİN) ilə Azərbaycan kanoe və avarçəkmə federasiyasının (AKAF) birgə təşkilatçılığı ilə “Mingəçevir reqatası-2024” beynəlxalq turniri keçiriləcək. Allsport.az xəbər verir ki, yarışda 12 ölkə – Azərbaycan, Estoniya, Gürcüstan, İtaliya, Macarıstan, Qazaxıstan, Litva, Moldova, Polşa, Türkiyə, Ukrayna və Özbəkistandan 100-dək idmançı mübarizə aparacaq. Ənənəvi reqata ilk dəfə işğaldan azad olunmuş Füzulidə – Aşağı Köndələnçay su anbarında təşkil ediləcək.
Yarışlara 16 oktyabrda Mingəçevir “Kür” olimpiya tədris-idman mərkəzində start veriləcək. Füzuli şəhərinin işğaldan azad olunması günü ilə əlaqədar 17 oktyabda Füzulidə Aşağı Köndələnçay su anbarında reqatanın rəsmi açılış mərasimi baş tutacaq. 18 oktyabr tarixində Mingəçevir “Kür” olimpiya tədris-idman mərkəzində final yarışları və bağlanış mərasimi keçiriləcək.

Azərbaycan kanoe və avarçəkmə federasiyası buna qədər işğaldan azad olunmuş ərazilərimizdən Suqovuşanda ilk dəfə geniştərkibli idman tədbiri, həmçinin “Prezident kuboku” və “Mingəçevir reqatası” beynəlxalq turnirlərini təşkil edib.