Ölkə başçısıdan baş məşqçi Firdovsi Umudova və 3-qat dünya çempionu Hacı Əliyevə özəl təşəkkür

Milli Olimpiya Komitəsinin 25 illik yubileyinə təntənəli tədbir keçirilib. Allsport.az saytı xəbər verir ki, tədbirdə dövlət başçısı, MOK-un prezidenti İlham Əliyev iştirak edib. Yubiley tədbiri zamanı o, sərbəst güləş üzrə Azərbaycan milli komandalarının baş məşqçisi Firdovsi Umudovla və 3-qat dünya çempionu Hacı Əliyevlə də görüşüb.

Prezident İlham Əliyev baş məşqçini və güləşçimizi son dünya çempionatında qazanılan uğur münasibətilə təbrik edib. Dövlət başçısı vurğulayıb ki, Azərbaycan güləşçiləri Fransanın paytaxtı Parisdə təşkil olunan yarışda ölkəmizin idman şərəfini layiqincə qoruyub, Hacı Əliyev müstəqil Azərbaycanın güləş tarixində ilk dəfə olaraq 3-cü dəfə dünya çempionu olub.

Ölkə başçısı milli komandanın baş məşqçisi Firdovsi Umudova pəhləvanlarımızın çıxışlarını hər zaman diqqətdə saxladığını bildirib və bundan sonra da onlardan yaxşı nəticələr gözlədiyini deyib. Diqqət və qayğıya görə dövlət başçısına minnətdarlığını bildirən Firdovsi Umudov Azərbaycanın idman şərəfəni hər zaman yüksəkdə tutacaqlarını və onlara bəslənilən etimadı bundan sonra da doğrultmağa çalışacaqlarını deyib.