Qadın güləşçilər lin 2-ci reytinq turnirində mübarizə aparacaq

Qazaxıstanın Almatı şəhərində güləş üzrə Polad Turluxanov kubokuna start verilib. Allsport.az saytı xəbər verir ki, ilin 2-ci reytinq turnirində ölkəmizi qadın güləşçilər təmsil edir. Baş məşqçi əvəzi Rövşən Umudovun və məşqçi Solmaz Adilovanın rəhbərliyi ilə Türkan Nəsirova, Şəhanə Nəzərova (hər ikisi – 50 kq), Leyla Qurbanova, Tatyana Varansova (53 kq), Jalə Əliyeva (59 kq) və Elis Manolova (65 kq) mübarizə aparacaqlar.

Yarışın proqramına əsasən, güləşçilərimiz iyunun 4-də xalça üzərinə çıxacaq. 50 kq-da mübarizəyə 1/4 finaldan start veriləcək. Türkan Nəsirova monqolustanlı dünya üçüncüsü Namuuntsetseq Tsoq-Oçirlə, Şəhanə Nəzərova isə qazaxıstanlı Aygül Nuralimlə qarşılaşacaq. Tatyana Varansova (53 kq) təsnifat mərhələsində Asiya çempionatının 2 qat bürünc medalçısı Aktenqe Keunimjaevayla, bu çəkidəki digər təmsilçimiz Leyla Qurbanova isə 1/4 finalda 23 yaşadək güləşçilər arasında dünya ikincisi Puca Gehlotla (Hindistan) üz-üzə gələcək.

59 və 65 kq-da iştirakçılar əvvəlcə qrup mərhələsində mübarizə aparacaq. Jalə Əliyeva Tsoqzolmaa Dorjsuren (Monqolustan), Ayşən İsmagülova (Qazaxıstan) və Difuzə Aimbetovayla (Özbəkistan), Elis Manolova isə Manişa Manişa (Hindistan), Dinora Rüstəmova (Özbəkistan) və Qazaxıstanın titullu güləşçisi Yelena Şaliginayla eyni qrupda yer alıb. 

İyunun 5-dək davam edəcək turnirində 1-ci kateqoriyalı hakim Elman İsmayılov ədaləti qoruyur.