“Qalatasaray” azarkeşləri Vanda Naraya təzyiq göstərirlər

“Qalatasaray” bir yandan super liqanın çempionu olmaq yolunda əmin addımlar atarkən digər tərəfdən də gələn mövsümün heyətini qurmaq üçün çalışır.

Allsport.az xəbər verir ki, “aslanlar”ın əsas hədəflərindən biri də azarkeşlərin çox sevdiyi futbolçu Mauro İkardini komandada saxlamaqdır. “Qalatasaray” İkardini mövsümün əvvəlində PSJ-dən icarəyə götürüb. Ona görə də bu mövsüm başa çatandan sonra hücumçu Paris klubuna qayıtmalı olacaq. Lakin İkardi PSJ-nin planlarında yer almadığına görə onun klubdan ayrılacağı gözlənilir. “Qalatasaray” isə 9 milyon avro transfer məbləği qarşılığında İkardini almağı planlaşdırır.

“Qalatasaray”dan başqa Avropanın bir neçə böyük klubu İkardini transfer etmək istəyir. “Qalatasaray” isə 3 aydır ki, İkardi üçün PSJ ilə danışıqlardadır. Lakin təbii ki, burada İkardinin də “Qalatasaray”da qalmaq istəməsi vacibdir. Çünki yaxşı təkliflər aldığı üçün İkardinin fikirləri dəyişir. Burada “Qalatasaray” azakreşləri də rol oynayır. Onlar həm İkardinin, həm də onun həyat yoldaşı Vanda Naranın sosial şəbəkə hesablarına “Bizimlə qalın” mesajları yağdırırlar.