“Real Madrid” tarixinin əfsanəsi olmaq istəyirəm”

“Real Madrid”in futbolçusu Vinisius Junior klubunu dəyişmək niyyətində deyil.

Allsport.az xəbər verir ki, bu barədə braziliyalı hücumçu insayder Fabritsio Romanoya açıqlamasında bildirib.

25 yaşlı Vinisius “kral klubu”nda qalmaq istədiyini deyib: “Real Madrid”lə müqaviləmin uzadılması tezliklə başa çatacaq. Hazırda 2027-ci ilə qədər sözləşməm var. Tələsik nəsə etməyə ehtiyacımız yoxdur, vaxtımız var. Prezident Florentino Pereslə bir-birimizə güvənirik. Klub üçün əlimdən gələn hər şeyi etmək üçün buradayam. “Real Madrid” tarixinin əfsanəsi olmaq istəyirəm”.

Vinisius Junior 2018-ci ildən “Real Madrid”in şərəfini qoruyur. O, Madrid təmsilçisinin heyətinə keçirdiyi 300 oyunda 102 qol və 76 məhsuldar ötürmə müəllifi olub.

Daha əvvəl Vinisius Juniorun Səudiyyə Ərəbistanı təmsilçilərindən 1 milyard avro dəyərində təklif aldığı deyilirdi.