Üzgüçülük federasiyasında yeni prezident

Azərbaycan üzgüçülük federasiyasının ümumi yığıncağı keçirilib.

Allsport.az xəbər verir ki, gənclər və idman nazirliyinin inzibati binasında keçirilən tədbir Dövlət Himnimizin səsləndirilməsi ilə başlanıb. Tədbirdə çıxış edən gənclər və idman naziri Fərid Qayıbov yığıncaq iştirakçılarını salamlayaraq onlara uğurlar arzulayıb.

Yığıncaqda Azərbaycan üzgüçülük federasiyasının icraiyyə komitəsinin tərkibi yenidən təsdiq edilib. Baş tutmuş səsvermənin nəticələrinə əsasən növbəti 4 il müddətinə Zaur Əliyev federasiyanın yeni prezidenti, Xaliq İldırımzadə, Dəyanət Sədullayev və Ümid Abuzərli vitse-prezidentlər, Şamil Əbdürrəhmanov, Eldar Abbasov, Ruslan Ələkbərov, Azər Babayev və Mark Koqanov isə icraiyyə komitəsinin üzvləri seçiliblər.

Sonda Zaur Əliyev çıxış edərək göstərilən etimada görə təşəkkür edib, bu idman növünün inkişafı üçün əlindən gələni edəcəyini bildirib. Federasiyanın sabiq prezidenti Xanlar Fətiyev yeni prezidentə və üzvlərə uğurlar arzulayıb.