Yeni 1-ci vitse-prezident güləşçilərimizə hansı tövsiyyələri verdi?

Bahadırlarımız təqvim planında nəzərdə tutulan qrafik üzrə qarşıdan gələn yarışlara hazırlıqları Olimpiya Güləş Mərkəzində davam etdirirlər. Allsport.az saytı xəbər verir ki, sərbəst və yunan-Roma güləşi üzrə yığma komandalar yanvarın 14-dən fevralın 1-dək cari ilin ilk təlim-məşq toplanışında iştirak edəcək. Hazırlığa Qazaxıstan və Ukrayna sərbəst güləş yığma komandaları da qoşulub.

Bu gün AGF-nin 1-ci vitse-prezidenti hər 3 yığma komandanın məşqini izləyib, indiki vəziyyət və qarşıdan gələn yarışlara hazırlığı ilə tanış olub. Pəhləvanlarımızla söhbət edən Firdovsi Umudov, ilk növbədə, idmançıların nizam-intizam qaydalarına riayət etməsinin vacibliyini bildirib:

“Hər bir idmançı ilk növbədə nizam-intizamlı olmalıdır. Uğur qazanmaq üçün intizamlı olmaq, proqram əsasında çalışmaq vacibdir. Güləşçilərimiz hər zaman mötəbər yarışlardan qalib ayrılaraq xalqımızı, dövlətimizi sevindiriblər. Qazanılan qələbələr ölkə başçısı, Milli Olimpiya Komitəsinin prezidenti cənab İlham Əliyev tərəfindən də yüksək qiymətləndirilib. Çalışmaq lazımdır ki, bundan sonra da nailiyyətlərimizlə güləş azarkeşlərini, xalqımızı sevindirək. Bunun üçün rəhbərlik tərəfindən hər cür şərait yaradılıb. Federasiya prezidenti cənab Fazil Məmmədov yığma komandaların hazırlığını daim nəzarətdə saxlayır”.

Təlim-məşq toplanışlarının artıq başladığını deyən 1-ci vitse-prezident güləşçilərin məşq proseslərindən maksimum yararlanmalı olduqlarının vacibliyini bildirib:

“Bizim üzərimizə, məşqçilərin və idmançıların üzərinə düşən ən vacib məsələ hazırlıqları ən yüksək səviyyədə davam etdirmək və qələbələr qazanmaqdır. Güləşçilər özləri də fiziki və taktiki hazırlıqlarının artırılması üçün, məşqlərdən maksimum faydalı istifadə etməyə çalışmalıdır. Hər bir yığma komanda üzvünün qələbə qazanmaq potensialı var, sadəcə əzmlə çalışıb mövcud potensialı ortaya qoymaq lazımdır.”