Yeni təlim-məşq bazası

Azərbaycan güləş federasiyası (AGF) maddi-texniki bazanın gücləndirməsi istiqamətində fəaliyyətini davam etdirir.

Allsport.az xəbər verir ki, bu çərçivədə növbəti addım atılıb.

Belə ki, AGF-nin yeni təlim-məşq bazası istifadəyə verilib. Xətai rayonu, Natiq Əliyev küçəsi 92 ünvanında yerləşən güləş mərkəzi yeniyetmə sərbəst güləşçilərin ixtiyarına verilib. Təlim-məşq bazası avadanlıqlarla tam şəkildə təmin edilib. 315 kvadratmetr ərazisi olan güləş mərkəzində məşqçi və fitnes otaqları, qazanxana, məşqçilər və idmançılar üçün sanitar qovşağı mövcuddur.

Bu gün federasiyanın yeni təlim-məşq bazasının açılış mərasimi keçirilib. Tədbirdə GİN, AGF rəsmiləri və məşqçilər iştirak edib. AGF-nin vitse-prezidenti Namiq Əliyev, AGF-nin icraiyyə komitəsinin üzvü, olimpiya çempionu Namiq Abdullayev, AGF-nin baş katibi Nəsimi Musayev, gənclər və idman nazirliyinin sektor müdiri Yaşar Rzayev, eləcə də sərbəst güləş üzrə U17 milli komandanın böyük məşqçisi Əsgərxan Novruzov çıxış edərək ürək sözlərini çatdırıb, yeni bazanın sərbəst güləşimizin inkişafına böyük təkan verəcəyini bildiriblər.

Bu güləş mərkəzində son illər beynəlxalq arenalarda qazandıqları uğurlarla diqqət cəlb edən U15 və U17 milli komandaların təlim-məşq prosesləri keçiriləcək.