Yunan-Roma güləş millimiz ardıcıl 2-ci dəfə dünya çempionu olub

Albaniyanın paytaxtı Tiranada qeyri-olimpiya çəkilərində dünya çempionatında yunan-Roma güləşçilərin yarışına yekun vurulub. Allsport.az saytı xəbər verir ki, millimiz möhtəşəm çıxış edərək, Azərbaycan güləş tarixində yeni səhifə açıb.

3 qızıl medal qazanan yığmamız 85 xalla dünya çempionu olub. Titulunu qoruyan komandamız ardıcıl 2-ci dəfə bu uğura yetişib. Azərbaycan ən yaxın izləyicisi olan İranı 34 xal qabaqlayıb.

Bu uğurla Azərbaycan güləşində birdən-birə 2 rekordu yeniləyib. İkinci dəfə dünya çempionluğu kubokunu qazanmaqla böyüklər arasında güləş növlərimiz arasında ilkə imza atan yunan-Roma millimiz, həm də bir DÇ-də 3 qızıl medal qazanan ilk komandamız olub.

Xatırladaq ki, Albaniyada Eldəniz Əzizli (55 kq), Nihat Məmmədli (63 kq) və Ülvü Qənizadə (72 kq) dünya çempionu olub. Onların hər biri komandanın hesabına 25 xal yazdırıb. DÇ-də debüt edən Qurban Qurbanov (82 kq) isə 5-ci yeri tutub və millimizə 10 xal qazandırıb.