AGF-nin prezident əvəzindən yunan-Roma güləşçilərinə mesaj: Problemlərlə məşqə gəlmək olmaz

Bu gün AFG-nin prezident əvəzi Namiq Əliyev yunan-Roma güləş yığmasının təlim-məşq toplanışını izləyib. Allsport.az saytı xəbər verir ki, baş katib Orxan Məmmədov, vitse-prezidentlər Elçin Cəfərov və Namiq Abdullayevin də qatıldığı görüşdə federasiya rəhbəri komandaya qarşıdan gələn məsul yarışlarda uğurlar arzulayıb, onların çatışmamazlıqları ilə maraqlanıb və fikrini çatdırıb:

“Əksəriyyətinizin kifayət qədər təcrübəsi var. Bir qisminiz yeniyetmələr və gənclər, bir qisminiz isə böyüklər arasında Avropa və dünya çempionatlarında, olimpiadalarda fərqlənmisiniz. Güləşdə yetərincə məsafə qət etmisiniz. Geriyə boylanıb, müəyyən yarışlarda çıxışlarınıza baxsanız, bəzən döyüşkənliyin çatmadığını görərsiniz. İdmançı ilk növbədə özünə inanmalıdır. Rəqiblərinizdə qeyri-adi bir şey yoxdur. Olimpiadaya gedəcək güləşçilərimiz gecə-gündüz olimpiya çempionu olacağını düşünməlidir. İdmançı ki, o arzuyla yaşamır, heç vaxt olimpiya çempionu ola bilməyəcək. 

Bu il Türkiyə və İranda keçirilən beynəlxalq turnirlərdə iştirak etmisiniz. Bir neçə güləşçi isə gələn həftə Macarıstandakı yarışda qüvvəsini sınayacaq. Avropa çempionatına çox az vaxt qalıb. Bu il 2-ci Avropa oyunları da olacaq. Ondan sonra isə bizi dünya çempionatı gözləyir.

Problemlərlə məşqə gəlmək olmaz. İdmançı gərək bütün diqqətini məşqinə yönəltsin. Hamınız peşəkar idmançısınız. Bu, sizin işinizdir. Həmişə geriyə boylanıb, səhvlərinizi təhlil edin. Hamınıza uğurlar arzulayıram”.

Sonra Elçin Cəfərov yığmamızın bir neçə komandayla birgə təlim-məşq toplanışı keçməsinin faydalı ola biləcəyini deyib. AGF-nin prezident əvəzi təklifi müsbət qarşılayıb və bu məsələnin həllini tapacağını bildirib.