Azərbaycan UEFA reytinq cədvəlində yerini qorudu

Avropa Liqasının pley-off mərhələsinin ötən gecə baş tutan ilk oyunları Azərbaycanın UEFA reytinqindəki mövqeyinə təsir göstərməyib. Allsport.az xəbər verir ki, ölkəmiz bu siyahıda əvvəlki yerini qoruyub.

Qeyd edək ki, Azərbaycanı qitənin nüfuzuna görə ikinci dərəcəli klub turnirində “Qarabağ”la “Qəbələ” təmsil edir. Qəbələnin eyniadlı təmsilçisi ötən gecə rəqib meydanında Yunanıstan “Panatinaikos”u ilə qarşılaşdı və 2:2 hesablı bərabərliyə razılaşdı. Ağdam klubu isə İsveçrə “Yanq Boyz”una doğma meydanda 3:0 hesabı ilə qalib gəldi. Nəticədə, klublarımız həm Azərbaycanın UEFA reytinqindəki xal ehtiyatını 0.375 balla zənginləşdirdilər, həm də tarix yazaraq, ikisi birlikdə Avroliqanın qrup mərhələsinə vəsiqəni təmin etdilər.

Hazırda UEFA reytinqində 54 ölkə arasında 26-cı pillədəyik. Azərbaycanın hesabında 13.625 reytinq xalı var ki, onun da 3.125 xalı cari mövsümdə qazanılıb (“Qəbələ” – 1.125, “Qarabağ” – 1.000, “İnter” – 0.750, “Neftçi” – 0.250).

Onu da əlavə edək ki, klublarımızın təsnifat mərhələsindəki istənilən qələbəsi Azərbaycana 0.250 reytinq xalı qazandırırdısa, heç-heçə 0.125 xal verirdi. Qrup mərhələsində isə heç-heçə 0.250, qələbə 0.500 xalla qiymətləndirilir.