Dünya kuboku 2-ci dəfə Azərbaycanda!

Bu gün Dünya güləş birliyinin icraiyyə komitəsinin onlayn iclası keçirilib. Allsport.az saytı xəbər verir ki, qurumun büro üzvü Namiq Əliyevin də qatıldığı vebinarda bir sıra yarışlarla bağlı önəmli qərarlar verilib. Öncə təqvimdə ilin ilk reytinq turniri kimi nəzərdə tutulmuş “Matteo Pellikone” yarışı İtaliyada Omikron virusunun geniş yayılması üzündən təxirə salınıb.

İtaliya hökumətinin məlum səbəbdən tətbiq etdiyi sərt məhdudiyyətlər DGB-ni bu addımı atmağa vadar edib. Romadakı yarış 22-25 iyun tarixlərində keçiriləcək. Belə olan halda, ilk reytinq yarışı fevralın 24-dən 27-dək İstanbulda ənənəvi xatirə turniri olacaq. İkinci reytinq yarışı Qazaxıstanda (2-5 iyun), mövsümün son reytinq turniri isə Tunisdə (14-17) baş tutacaq.

DGB prezidenti Nenad Laloviç məsələylə bağlı bunları deyib: “İnanırıq ki, bu dəyişikliklər hər il keçirilən reytinq yarışlarına fayda verəcək. Bu turnirlərdə güləşçilərə xallar veriləcək. İlin sonunda toplanan xallara əsasən ən yaxşı güləşçilər müəyyənləşəcək”.

Tədbirdə ilin sonunda keçiriləcək dünya kubokunun məkanları da müəyyənləşib. Sərbəst və qadın güləşi üzrə yarış 2022-23-cü illərdə İovada (ABŞ) təşkil olunacaq. Yunan-Roma güləşi üzrə analoji yarış isə ölkəmizə həvalə olunub. Bu il noyabrın 5-6-da keçiriləcək yarışa Bakı ev sahibliyi edəcək.

Əvvəlki illərdən fərqli olaraq bu dəfə Dünya Kubokunda 8 yox, 6 komandanın iştirakı nəzərdə tutulub. Ötən il Norveçdə dünya çempionatında komanda hesabında ilk “5-lik”də yer alan Rusiya, İran, Azərbaycan, Gürcüstan və Türkiyə ilə yanaşı, dünya yığması (All Star) kubok uğrunda mübarizə aparacaq. Yunan-Roma güləşi üzrə dünya kuboku 5 illik fasilədən sonra keçiriləcək. “Klassik”lərimiz 1 dəfə kuboku başı üzərinə qaldırıb. Komandamız 2015-də Tehranda qalib olub.  

Ölkəmizdə 2 dəfə sərbəst güləş üzrə dünya kuboku keçirilib. 2004-cü ildə bizimkilər, 2012-ci ildə İran qalib olub. 2009-cu ildə Arazın o tayında keçirilmiş eyni yarışda komandamız qızıl medalq azanıb.