Gəncədə 19 məşqçi-müəllim kursda iştirak edib

Azərbaycan voleybol federasiyasının Gəncədə məşqçi-müəllimlər üçün təşkil etdiyi kurs başa çatıb.

Allsport.az xəbər verir ki, Gəncə OİK-də baş tutan və beş gün davam edən “1-ci dərəcə” məşqçi kursunda Gəncə ilə yanaşı, ətraf rayon və şəhərlərdən 19 məşqçi-müəllim iştirak edib. Dərslər AVF-nin təlim və aşağı yaş qruplarının rəhbəri Çingiz Axarçeşmə tərəfindən keçirilib.

Məşğələnin sonuncu günündə iştirakçılar nəzəri və praktiki imtahan veriblər. Hər iki imtahanı uğurla keçən 8 mütəxəssisə AVF-nin “1-ci dərəcə” sertifikatı təqdim olunub.

Federasiya tərəfindən ötən il Qəbələdə, Sumqayıtda və Bakıda “1-ci dərəcə” məşqçi kursları keçirilib. AVF Bakıda və digər bölgələrdə birinci dərəcə ilə yanaşı, ikinci və üçüncü dərəcəli kurslar da təşkil edəcək. “1-ci dərəcə” sertifikatı almış məşqçi-müəllimlər yerli çempionatlarda məşqçilik edə biləcəklər. Hər üç dərəcəni alacaq mütəxəssislər isə FİVB-nin level-1 seminarında iştirak hüququ qazanacaqlar.