Həndbolçumuzun komandası «Borussiya»nı Dortmundda 11 top fərqi ilə yenib

Millimizin qapıçısı Valentina Salamahanın formasını geyindiyi «Bietiqheym» klubu qadın həndbolçuların Bundesliqasında növbəti görüşə çıxıb. Allsport.az saytı xəbər verir ki, çempionatın öncülü 14-cü turda Dortmundda yerli «Borussiya»nın qonağı olub.

Əvvəldən sonadək üstün oyun nümayiş etdirən həndbolçumuzun komandası 11 top fərqi ilə qalib gəlib – 28:17 (13:9). Bu matçda da qapısımız meydanda olub.

«Bietiqheym» yarış cədvəlində maksimum nəticə, 28 xalla 1-ci sırada yerini qoruyur. Lider növbəti görüşünü fevralın 28-də evdə «Qöppingen»ə qarşı keçirəcək.