“İnter”lə “Neftçi”nin heç-heçəsi və “Qəbələ”nin qələbəsi Azərbaycanı irəli saldı

Avropa Liqasının birinci təsnifat mərhələsinin ötən gecə baş tutan cavab oyunları Azərbaycanın UEFA reytinqindəki mövqeyini yaxşılaşdırmağa imkan verib. Allsport.az xəbər verir ki, ölkəmiz bu siyahıda bir pillə irəliləyib.

Qeyd edək ki, ötən gün Azərbaycanın avrokuboklardakı təmsilçilərinin üçü növbəti oyununu keçirdi. Belə ki, “Neftçi” səfərdə Çernoqoriya “Mladost”u (1:1), “İnter” isə evdə Albaniyanın “Laçi” klubu ilə (0:0) sülhə razılaşdı. Digər təmsilçimiz “Qəbələ” isə doğma meydanda Tiflis “Dinamo”suna qalib gəldi – 2:0.

“İnter”lə “Neftçi”nin heç-heçələri, eləcə də “Qəbələ”nin tarixi qələbəsi ölkəmizin xal ehtiyatını zənginləşdirdi. Həm “bankirlər”, həm də “ağ-qaralar” Azərbaycanın reytinqinə əlavə 0.125, “Qəbələ” isə 0,250 xal yazdırmış oldu.

Hazırda UEFA reytinqində 53 ölkə arasında 28-ci pillədəyik. Azərbaycanın hesabında 11.250 reytinq xalı var ki, onun da 0.750 xalı cari mövsümdə qazanılıb (“İnter” – 0.250, “Neftçi” – 0.250, “Qəbələ” – 0.250).

Onu da əlavə edək ki, klublarımızın təsnifat mərhələsindəki istənilən qələbəsi Azərbaycana 0.250 reytinq xalı qazandırır. Heç-heçə isə sadəcə, 0.125 xal verir. Qrup mərhələsində heç-heçə 0.250, qələbə 0.500 xalla qiymətləndirilir.

Sonda reytinq cədvəlinin son variantını təqdim edirik: