Kamadan oxatma üzrə məşqçilik təlimi

Bakıda dünyaşöhrətli mütəxəssis Göytuğ Ərginin iştirakı ilə beynəlxalq məşqçilik təlimi keçirilib

​Allsport.az xəbər verir ki, Azərbaycan idman akademiyasında ölkə oxatmasının inkişafında mühüm mərhələ hesab olunan xüsusi ustad dərsləri və məşqçilik təlimi uğurla başa çatmışdır. 4-5 fevralda baş tutan intensiv proqram Türkiyə kamandan oxatma milli komandasının baş məşqçisi və “World Archery” (dünya oxatma federasiyası) məşqçilər komissiyasının sədri Göytuğ Ərginin rəhbərliyi ilə keçirilib.
Təlimin əsas istiqamətlərini dünya standartlarına uyğun müasir atış texnikaları, beynəlxalq təlim metodologiyaları və yarış zamanı tətbiq olunan psixoloji hazırlıq üsulları təşkil etmişdir. İştirakçılar həm nəzəri, həm də praktiki məşğələlər vasitəsilə hədəf seçimi, gərgin atmosferdə fokuslanma və qlobal oxatma dünyasındakı son trendlər barədə ətraflı məlumat əldə etmişlər. Proqramda həm peşəkar oxatanlar, həm də parakamandan oxatma üzrə idmançı və məşqçilərin iştirakı təcrübə mübadiləsinin əhatə dairəsini daha da genişləndirmişdir.
​Təlimin sonunda iştirakçıların qazandığı bilik və bacarıqlar yüksək qiymətləndirilmiş, onlara Göytuğ Ərgin və federasiya nümayəndəsi Kamran Həsənzadə tərəfindən xüsusi sertifikatlar təqdim olunmuşdur.
​Bu layihənin əsas məqsədi Azərbaycan oxatmasını beynəlxalq standartlara uyğunlaşdırmaq və ölkəmizdə peşəkar məşqçi korpusunu gücləndirməkdir. Gözlənilir ki, bu cür yüksək səviyyəli hazırlıq təlimləri idmançılarımızın gələcək beynəlxalq turnirlərdə və dünya çempionatlarında daha parlaq qələbələr qazanmasına, eləcə də yeni rekordlara imza atmasına möhkəm zəmin yaradacaqdır.