Millimizin sabiq üzvü Rusiya klubunun baş məşqçisi təyin edildi

Azərbaycan yığmasının sabiq müdafiəçisi Emin Ağayev baş məşqçi təyin olunub. Allsport.az хəbər verir ki, o, bundan sonra Rusiyanın “Volqa” klubunu çalışdıracaq.

Bu barədə klubun rəsmi saytı məlumat yayıb. Məlumatda bildirilir ki, bu gün klubun ofisində yeni baş məşqçi ilə müqavilə imzalanıb.

Qeyd edək ki, Emin Ağayev 2008-2011-cu illərdə “Volqa”da çıхış edib və 90 oyunda 2 qol vurub. 2011-ci ildə bu komandada karyerasını bitirən müdafiəçi 4 il sonra geri dönüb.

41 yaşlı veteran müdafiəçi karyerası ərzində Azərbaycanın “Neftçi”, Rusiyanın “Anji”, “Torpedo-ZİL”, “Ximki”, “Baltika”, “Dinamo” (Bryansk), “Nosta” və “Nara-ŞBFR” klublarında çıхış edib. 1994-2005-ci illərdə millimizin formasını geyinən futbolçu 65 oyunda 1 qol vurub.

Məşqçi fəaliyyətinə 2011-ci ildə “Anji”də Hacı Hacıyevin köməkçisi kimi başlayan Ağayev 2011-2014-cü illərdə Kaspiysk “Dağdizel”inə rəhbərlik edib. Dağıstan klubu ötən yay aşağı dəstədə çıxışını dayandırandan sonra həmyerlimiz bir müddət işsiz qalmışdı.

İkinci divizionun Qərb zonasında çıxış edən “Volqa” qış fasiləsinə 15 komanda arasında 12-ci pillədə yollanıb. Klub rəhbərliyi 20 turda 21 хal toplayan komandanın baş məşqçisi Leonid Tkaçenkonu istefaya göndərib.

Qeyd edək ki, Ağayevin komandası hazırlıqlara fevralın 9-da start verəcək. Baş məşqçi tezliklə köməkçilərini müəyyənləşdirəcək.