“Neftçi”nin Müşahidə Şurasının toplantısı keçirilib

“Neftçi”nin inzibati binasında klubun Müşahidə Şurasının növbəti iclası keçirilib. Allsport.az saytı xəbər verir ki, toplantıda komandanın növbəti mövsümdə keçiriləcək 80 illik yubiley tədbirləri və ən əsası “A” komandanın növbəti mövsüm üçün hazırlıq planları müzakirə mövzusu olub. İsmət Qayıbov adına təlim-məşq bazasının flaqmanın balansına verilməsi və yenisinin inşası, “Bakcell Arena”nın “Neftçi”nin idarəçiliyinə keçməsi, 80 illik yubiley ilə əlaqədar görüləcək işlərin həcminin çoxalması və klubda idarəetmə effektivliyinin artırılması məqsədi ilə qərara alınıb:

1. “Neftçi”nin idman direktoru ayrıca olaraq Müşahidə Şurasına tabe edilsin.
2. “Neftçi”nin “Media və İctimaiyyətlə Əlaqələr Departamenti” əlavə olaraq həm də Müşahidə Şurasına tabe edilsin.
3. “Neftçi”nin 2017-ci ildə qeyd olunacaq 80 illik yubileyi ilə əlaqədar olaraq xüsusi komitə yaradılsın. “Neftçi” PFK-nın Müşahidə Şurasının sədri Çingiz Abdullayev komitəyə sədr seçilib. Komitənin katibi vəzifəsini klubun icraçı direktoru Elnur Məmmədov yerinə yetirəcək. İlkin olaraq Müşahidə Şurasının üzvləri – Cəbrayıl Cəbrayılov, Zaur Qəhrəmanov, Mehdi Nəcəfov, Səməd Qurbanov, Fərhad Bədəlbəyli və Bəhram Bağırzadə isə komitədə üzv funksiyasını icra edəcəklər. Qeyd edək ki, bu, komitə üzvlərinin ilkin siyahısıdır. Əlavə olaraq komitədə futbol ictimaiyyətinin tanınmış simaları da yer alacaqlar. Komitə üzvlərinin tam geniş siyahısı 1 ay ərzində müəyyənləşdiriləcək.

İclasdan sonra Müşahidə Şurasının üzvləri Qəbələyə yollanan komanda heyəti ilə görüşüblər. Komandanı yola salan rəhbərlik çempionat və kubok oyunlarında “Neftçi”yə uğurlar arzu edib.