Roberto Mançini: “Bakıya qələbə qazanmağa gəlmişik”

İtaliyanın “İnter” klubunun baş məşqçisi Roberto Mançini Bakıda mətbuat konfransı keçirib. Allsport.az xəbər verir ki, o, sabah Avropa Liqasının qrup mərhələsi çərçivəsində “Qarabağ”a qarşı keçiriləcək oyun öncəsi fikirlərini açıqlayıb:

– Türkiyədə çalışmağınız “Qarabağ”la oyunda sizə kömək edə bilər?
– Türkiyədə işləməyimin əhəmiyyəti yoxdur. “Qarabağ”ı yaxşı təhlil etmişik. Bura qələbə üçün gəlmişik.

– “İnter” “Udineze” ilə iki fərqli hissə oynadı. Bu, yorğunluqla bağlıdır, yoxsa başqa səbəbi var?
– Düşünmürəm ki, burada fiziki amilin rolu var. Biz həmin görüşdə də yaxşı çıxış etdik.

– Razısınızmı, “İnter” və “Qarabağ” qrupda ən zəif hücum xəttinə malik olan komandalardır?
– Bunu deyənlərdən soruşsanız yaxşı olar. Düşünmürəm ki, hücum xəttimiz zəifdir. Əlbəttə ki, həm “Qarabağ”ın, həm də “İnter”in hücumçuları güclüdür. Bura gəzməyə yox, qələbə qazanmağa gəlmişik.

– “Qalatasaray”dakı uğursuzluğunuz hazırda “İnter”də də davam edir. Bunun səbəbi sizdədir, yoxsa komandalarda?
– Siz yəqin “Qalatasaray”ın ötənilki oyunlarını yaxşı izləməmisiniz. “İnter” hazırda 12-ci pillədə olsa da, irəli getməyə çalışırıq.

– “İnter” 2010-cu ildə Çempionlar Liqasının qalibi oldu. Həmin komandanın fundamentini siz qoymuşdunuz. Yenidən o heyəti formalaşdıra biləcəksiniz?
– 2010-cu ildəki “İnter”lə indikinin fərqi odur ki, hazırkı komanda gənclərdən ibarətdir. İndi çempion olmaq çətindir. 2010-cu ildə isə asan idi.

– “İnter” Bakıya 9 müdafiçi, 4 yarımmüdafiəçi ilə gəlib. Bu, o deməkdir ki, sabah komandanız müdafiədə oynayacaq?
– Xeyr. Biz qələbə üçün gəlmişik.

– Bir rəqib kimi “Qarabağ” haqda nə deyə bilərsiniz?
– “Qarabağ” çox yaxşı komandadır. İnanıram ki, sabah azerkeşləri çox maraqlı oyun gözləyir.