Ruslan debüt etdi, Vüqar gözləyir

“Qəbələ” “transfer pəncərəsi” bağlanandan sonra heyətinə daha 2 futbolçu cəlb etdi. Allsport.az xəbər verir ki, bunlar “Xəzər Lənkəran”dan ayrılan müdafiəçi Ruslan Abışovla hücumçu Vüqar Nadirovdur. “Qırmızı-qaralar”ın yeni üzvləri yeniliklə bağlı təəssüratlarını “Qəbələ İK” ilə bölüşüblər.

Ruslan Abışov: “Komandamıza çox güvənirəm”

“Qəbələ” Vüqarın karyerasında yeni klubdursa, Ruslan ötən mövsümü bu komandada keçirib, kapitan olub. Klubla birillik müqavilə imzalayan təcrübəli müdafiəçi yenidən “qırmızı-qaralar”ın heyətində çıxış etməkdən məmnundur: “Baş məşqçi Roman Qriqorçuk məni yenidən sərəncamında görmək istədi. Açığı, gözləmirdim. Ailəmlə məsləhətləşdikdən sonra “Qəbələ”yə qayıtmağı qərara aldım. Doğrudur, başqa təkliflər vardı, ancaq “Qəbələ”yə dönməyi daha məqsədəuyğun saydım. Yenidən burda olmaqdan məmnunam”.

Ruslanla Vüqar “Xəzər Lənkəran”da yeni futbolçuların oynamasına UEFA tərəfindən qoyulan qadağaya görə, Topaz Premyer Liqasının avqust ayında keçirilən ilk 4 turunda meydana çıxa bilməyiblər. Cəzanın ilin sonunadək uzadılması futbolçuların uzun müddət oyun praktikası sarıdan əziyyət çəkməsi demək idi. Abışov sonuncu dəfə rəsmi matçı may ayında, “Qəbələ”nin heyətində “Bakı”ya qarşı keçirmişdi: “Əlbəttə, oynamamaq hər bir futbolçuya sonradan çətinlik yaradır. Əsas odur ki, ilk oyunumda uğurlu nəticə əldə etdik. Cari mövsümdə debüt etdiyim “Sumqayıt”la matçda, çətin də olsa, qələbə qazandıq. Doğrudur, məndə bir az yorğunluq vardı. Ancaq bu, zamanla qaydasına düşəcək. Mənə elə gəlir ki, 2-3 turdan sonra oyunum daha yaxşı olacaq”.

28 yaşlı futbolçunun fikrincə, “Qəbələ”nin potensialı Premyer Liqanın qalibi olmağa imkan verir: “Ötən mövsümdəki komandada oynamaq, məncə, daha rahat idi. Bəlkə bu, hazırkı heyətə yeni qoşulmağımdan irəli gəlir. Əlbəttə, hazırkı “Qəbələ”ylə də böyük uğurlar qazanacağımıza inanıram. Çempionluq barəsində danışmaq tezdir, çünki qarşıda xeyli çətin oyunlar olacaq. “Sumqayıt”la matç göstərdi ki, çempionatda asan sınaq olmayacaq. Çempion olmaq istəyiriksə, ”Qarabağ” kimi güclü komandayla rəqabət aparacağıqsa, hər oyunda qələbəyə köklənməliyik”.

Son transferlər “Qəbələ”yə Avropa Liqasının qrup mərhələsində kömək edə bilməyəcəklər. Çünki onların keçidləri həll olunan zaman “Qəbələ” sifariş ərizəsini artıq UEFA-ya göndərmişdi. Ruslan üzləşdiyi vəziyyətə görə üzülsə də, ümidini itirmir: “Əlbəttə, çox istərdim ki, Avroliqa oyunlarında çıxış edim. “Rubin”lə bu mərhələdə oynasam da, “Qəbələ”nin heyətində tamam başqa cür ola bilərdi. Ancaq oynaya bilməməyim məndən asılı məsələ deyil və görünür, bu dəfə qismət deyilmiş. Əslində, bu, cari mövsümdə də mümkün ola bilər. “Qəbələ” 1/16 finala çıxsa, mən də istəyimə çata bilərəm. Avropa Liqasında komandamıza çox güvənirəm”.

Vüqar Nadirov: “Qarabağ”ı niyə də üstələməyək?”

Ruslandan fərqli olaraq, Vüqara Azərbaycan klubunun heyətində Avropa Liqasının qrup mərhələsində oynamaq nəsib olub. O, uzun illər şərəfini qoruduğu “Qarabağ”la ötən il bu mərhələdə oynayıb və hətta qol da vurub: “Ardıcıl ikinci il qrup mərhələsində oynamaq əla olardı. Bilirəm ki, qrup mərhələsinin ab-havası necədir, qol vuranda hansı hissləri keçirirsən. İnanın, bu, çox maraqlıdır. Ümid edirəm, “Qəbələ” qrupdan çıxacaq və mən pley-offda oynamaq şansı qazanacağam”.

Hələliksə Nadirov “Qəbələ”nin əsas komandasında debüt edəcəyi anı gözləyir. O, bunun üçün yaxşı forma yığmağın vacib olduğunu bilir: “Yığmanın üzvü olduğumdan, oynamaq mənim üçün çox önəmlidir. Millimizin baş məşqçisi Robert Prosineçki də iddialı klubda çıxış etməyimizi istəyirdi. Yəqin ki, “Qəbələ” variantı onun üçün də xoş oldu. Əslində, “Qəbələ” hələ təsnifat mərhələsində çıxış edərkən, məni istəyirdi. Ancaq həmin vaxt bəzi səbəblərə görə “Xəzər Lənkəran”ı tərk edə bilmədim. Qarşılıqlı razılığa əsasən, “Qəbələ” ilə 6 aylıq müqavilə bağladıq”.

28 yaşlı hücumçu yeni baş məşqçisi Roman Qriqorçukla işbirliyindən də danışdı. Vüqar zəngin futbolçu təcrübəsinə əsaslanaraq, tez bir zamanda formaya düşəcəyinə inanır: “Oyun praktikası sıradan korluq çəkirəm. Ancaq məndə illərin təcrübəsi toplanıb. Templə çalışıb, əvvəlki formamı qaytaracağam. Qriqorçuk çox tələbkar mütəxəssisdir. Mən də məşqlərdə onun tələblərini yerinə yetirməyə çalışıram. Onun mənə hələ ki əsas heyətdə yer verməməsini normal qəbul edirəm. Öncə “18-liy”ə düşüb, sonra əsas heyətdə yer almağı düşünürəm. Həm yarımmüdafiənin cinahlarında, həm də hücumun mərkəzində oynaya bilirəm. Məşqlərdən hiss edirəm ki, Qriqorçuk məni sağ cinah yarımmüdafiəçisi mövqeyində görür”.

Vüqar “Qəbələ”nin Premyer Liqanın qalibi olmaq uğrunda mübarizədə son 2 mövsümün çempionu “Qarabağ”ı üstələyəcəyinə inanır: “Niyə də olmasın? İkisi də bərabər səviyyəli komandadır. Hesab edirəm ki, “Qarabağ”la matçlarımız çox maraqlı və prinsipial olacaq. “Qəbələ” Avropa Liqasındakı çıxışıyla göstərir ki, çempion olmağa layiqdir”.