“Simurq” məşqlərə başladı

Milli komandanın oyunu ilə əlaqədar Topaz Premyer Liqasına verilmiş fasilədən istifadə edən “Simurq”un məşqçilər korpusu yetirmələrinə martın 23-nə qədər istirahət vermişdi. Allsport.az xəbər verir ki, artıq dünəndən məşqləri bərpa edən “Simurq” növbəti turun hazırlıqlarına start verib. Çalışmalarda yalnız U-21-in heyətində olan Rəşad Əzizli, Vadim Abdullayev və Vüqar Mustafayev iştirak etməyib.

İlk məşq günü baş məşqçi Georgi Çixradze yetirmələrini elə də çox yormayıb. Qaçış və isinmə hərəkətlərindən sonra qısa ötürmələr və qruplara bölünərək “kvadrat” oynanılıb. Sonda isə ikitərəfli oyunla hazırlıq tamamlanıb. Bu günkü məşqdə isə əssasən fiziki gücün bərpasından ibarət çalışmalar yerinə yetirilib.

Qeyd edək ki, “Simurq” Topaz Premyer Liqasının 27-ci turunda doğma arenada AzAL-ı qonaq edəcək. Qarşılaşma yeni ayın ilk günündə, saat 15:00-da start götürəcək.