Avropa Şurasının antidopinq konvensiyasının monitorinq qrupunda nələr müzakirə olunub?

Azərbaycan milli antidopinq agentliyinin icraçı direktoru Təhminə Tağızadə Avropa Şurasının (AŞ) antidopinq konvensiyası monitorinq qrupunun 57-ci iclasında iştirak edib.

Allsport.az xəbər verir ki, noyabrın 9-da Fransanın Strasburq şəhərində başlayan açıq plenar iclas institusional və inzibati məsələlərə, o cümlədən ötən iclasın gündəliyinin və hesabatının qəbuluna həsr olunub. Nümayəndə heyətləri əlaqələndirici qrupun fəaliyyəti ilə bağlı yenilənmiş məlumatlara, katibliyin hesabatına və digər işçi sənədlərə baxıblar.
T-DO məsləhət qrupları təhsil və elmi məsələlər, o cümlədən hüquqi və digər aspektlər üzrə yenilikləri təqdim ediblər.

Noyabrın 10-da iclasda antidopinq standartlarının müəyyən edilməsi məsələləri, o cümlədən antidopinq agentlərinin farmakoloji siniflərinin qəbulu, T-DO-nun strategiyası və əməliyyat proqramı üzrə tərəqqi hesabatı, antidopinq sahəsində ədalətli proses üçün tövsiyələrin icrası müzakirə olunub.

İştirakçı ölkələrdə monitorinq məsələləri qiyabi müzakirə olunub, Belçika, Fransa, Macarıstan və Albaniya üçün ətraflı qiymətləndirmələr aparılıb. İclas illik milli antidopinq siyasəti Sorğusunun müzakirəsi və gələcək görüşlərin planlaşdırılması ilə yekunlaşıb.

İclasda, həmçinin Avropa şurasının digər qurumları və xarici tərəfdaşlarla əməkdaşlığın müzakirəsi də tədbirin gündəliyində yer alıb.

Tədbirdə Azərbaycan gənclər və idman nazirliyinin tibbi təminat sektorunun məsləhətçisi Azər Məmmədov, AMADA-nın elm şöbəsinin müdiri Rüfət Əfəndiyev və Hüquq şöbəsinin rəhbəri Fərhad Abbasov da iştirak ediblər.