Topaz Premyer Liqasında 5-ci tur rəqəmlərin gözü ilə

Bu həftə Topaz Premyer Liqasında 5-ci turun oyunlarına start veriləcək. Allsport.az xəbər verir ki, həftənin mərkəzi oyunu “Neftçi” və “Xəzər Lənkəran” arasında keçiriləcək.

Mövsümün ilk “Böyük oyun”u paytaxtda baş tutacaq. 3 gün davam edəcək turun son qarşılaşması isə sentyabrın 21-də keçiriləcək. Peşəkar Futbol Liqasının rəsmi internet saytı üz-üzə gələcək cütlərin Premyer Liqadakı oyunlarının balansını təqdim edir.

Topaz Premyer Liqası
5-ci tur
19 sentyabr (şənbə)

AZAL – “İnter” – 26 oyun, +5=12-9, top fərqi 20-24

27-ci paytaxt derbisinə 10-cu qələbə üçün çıxacaq “İnter” 7 oyundur rəqibinə uduzmur. AZAL-ın son 3 ev oyununda hər iki komanda qol sevinci yaşayıb. Səfərdəki son 6 qarşılaşmada xal qazanan “İnter” 4 il 5 aydır rəqib meydanında xalsız qalmır.

“Zirə” – “Rəvan” – – indiyədək qarşılaşmayıblar

20 sentyabr (bazar)
“Kəpəz” – “Qarabağ” – 37 oyun, +14=8-15, top fərqi 49-44

“Kəpəz” 12 oyundur rəqibinə qalib gəlmir. “Qarabağ”ın xal qazanmadığı son qarşılaşma 13 il 5 ay əvvəl baş tutub. Gəncə təmsilçisi son 3 görüşdə cəmi 1 qol vurub.

“Neftçi” – “Xəzər Lənkəran” – 33 oyun, +12=14-7, top fərqi 38-27

Premyer Liqadakı 34-cü “Böyük oyun” öncəsi “Neftçi” 8 matçdır rəqibinə uduzmur. Paytaxt klubu son 7 qarşılaşmada meydanı qolsuz tərk etmir. “Xəzər Lənkəran” səfərdə 5 oyundur xal qazanmır, 3 qarşılaşmadır qol vurmur.

21 sentyabr (bazar ertəsi)
“Qəbələ” – “Sumqayıt” – 12 oyun, +10=1-1, top fərqi 27-8

Son 3 qarşılaşmada 2 qol vurulub. “Qəbələ” əvvəlki 12 matçın hamısında qol sevinci yaşayıb. “Sumqayıt” səfərdə xal qazanmayıb.