Topaz Premyer Liqasında 8-ci tur rəqəmlərdə

Bu həftə Topaz Premyer Liqasında 8-ci turun oyunları keçiriləcək. Allsport.az xəbər verir ki, milli komandaların qarşılaşmaları ilə əlaqədar yaranan fasilədən sonra baş tutacaq tur 3 gün davam edəcək.

Həftənin mərkəzi oyunları liderlər qrupunda qərarlaşan “Qarabağ”la “Zirə”, həmçinin “Nefrçi” ilə “Qəbələ” arasında keçiriləcək. Peşəkar Futbol Liqasının rəsmi internet saytı üz-üzə gələcək cütlərin Premyer Liqadakı oyunlarının balansını təqdim edib.

Topaz Premyer Liqası
8-ci tur
16 oktyabr (cümə)

36. “Rəvan” – “Kəpəz” – 8 oyun, +3=0-5, top fərqi 15-12

“Kəpəz” ardıcıl 3 oyundur qalib gələ bilmir. “Rəvan”ın meydanındakı bütün oyunlarda 3 və daha çox qol vurulub. Paytaxt təmsilçisi bu qarşılaşmaların 4-də də qol sevinci yaşayıb.

17 oktyabr (şənbə)
39. “Neftçi” – “Qəbələ” – 28 oyun, +13=7-8, top fərqi 39-27

Son 6 qarşılaşmada meydan sahibi olan komanda qalib gəlməyib. Son 11 oyundan 9-da hər iki komanda qol vurub.

38. “Qarabağ” – “Zirə” – indiyədək qarşılaşmayıblar

18 oktyabr (bazar)
37. “Sumqayıt” – “İnter” – 12 oyun, +1=3-8, top fərqi 4-18

Sumqayıtın eyniadlı klubu indiyədək cəmi 1 dəfə qalib gəlsə də, son 3 oyunda uduzmayıb. “İnter” səfərdəki 6 matçdan yalnız birində qol buraxıb.

40. “Xəzər Lənkəran” – AzAL – 28 oyun, +14=9-5, top fərqi 36-22

Rəqiblərin son 8 oyununda qonaq komanda qalib gəlməyib. “Xəzər Lənkəran” ardıcıl 9 matçdır meydanı qolsuz tərk etmir.