Həmyerlimiz UEFA-nın iclasında

“Qarabağ”ın idarə heyətinin üzvü Asif Əsgərov, UEFA-nın klub yarışların təşkili komitəsinin növbəti iclasında iştirak edib. Allsport.az saytı xəbər verir ki, tədbir Londonda keçirilib. Həmyerlimizin üzv olduğu komitənin toplantısında 2024-27-ci illərdə keçiriləcək yarışlarla bağlı media, kommersiya satışlarındakı yeniliklər müzakirə olunub.

Komitə üzvləri avrokuboklara qatılmayan klublara maliyyə yardımı, qonaq komandalara ayrılan biletlərin maksimal qiyməti barədə fikir mübadilələri aparıblar. Yığıncaqda turnirin qalibinin öz ölkəsinə əlavə yer qazandırdığı vaxt klub bölgüsünün yenidən balanslaşdırılması məsələləri müzakirəyə çıxarılıb.

Tədbirdə DÇ-2026 və klublararası DÇ-2025-in digər turnirlərə, həmçinin komandalara təsiri ilə bağlı müzakirələr də aparılıb. Tədbir iştirakçıları yeni sponsorlarla iş prosesinin gedişi, təsdiqlənmiş və davam edən tərəfdaşlarla danışıqların aparılması prosedurları ilə tanış olublar.

Asif Əsgərov komitənin digər üzvləri ilə “Uembli” stadionunda “Borussiya” (Dortmund, Almaniya) – “Real” (Madrid, İspaniya) arasında çempionlar liqasının final oyununu izləyəcək. O, UEFA-nın final oyununa dəvət etdiyi ali qonaqlar arasındadır.