Vaqif Cavadov 198-ci oldu

Topaz Premyer Liqasında AzAL-la oyun “Qəbələ”nin futbolçusu Vaqif Cavadov üçün əlamətdar olub. Allsport.az xəbər verir ki, 26 yaşlı hücumçu “Qəbələ”də rəsmi debütünü gerçəkləşdirib.

Bunadək əvəzedici heyətdə forma geyinən Vaqif əsas komandanın tarixinə 198-ci futbolçusu kimi düşüb. Bunlardan 106-sı yerli, 92-i əcnəbi futbolçu olub. “Xəzər Lənkəran”dan bu ilin sonunadək icarəyə götürülən Cavadov “Qəbələ”nin milli çempionatımızda debüt edən 181-ci futbolçusu olub.

Bu mövsüm komandaya gələn futbolçulardan yalnız Vüqar Nadirov hələ ki, debüt etməyib. Rumıniyalı yarımmüdafiəçi Georgi Floresku isə bunu Topaz Premyer Liqasında yox, Avropa Liqasında gerçəkləşdirib.